Coa data de comezo de Amores Prohibidos 2.0 achegándose perigosamente, a semana pasada tivemos unha xuntanza cos alumnos do IES A Cachada interesados en participar no proxecto. Son xa unha chea deles e cada día apúntanse máis.

Como xa levábamos moitos días de teoría, decidimos comezar a meternos en fariña e facer algún exercicio sobre teatro. Aínda que nesta iniciativa van ter cabida todos os rapaces que estean interesados, e tamén algún adulto, imos precisar que algúns lles poñan cara aos personaxes da obra, e por iso lles pedimos a algúns dos presentes que se metesen na pel de Xulieta e de Romeo. Os resultados foron moi bos, e para amosalo deixámosvos estas imaxes de Raúl, un dos estudantes que van participar en Amores Prohibidos 2.0, falando con Xulieta que, iso si, desta vez perdeu a súa natureza humana e converteuse en can.

Xa nos diredes que opinades....

O martes pasado (coincidindo co Día dos Namorados: tratándose dun proxecto baseado en Romeo e Xulieta non podíamos desperdiciar a oportunidade) presentamos Amores Prohibidos 2.0 no IES A Cachada de Boiro. O acto ía dirixido aos medios e, sobre todo, aos/as rapaces/as do instituto que non estaban a participar na iniciativa. Pareceunos que saíra todo moi ben. Veu moita prensa, o público adolescente estivo calado e moi atento e case se nos rematan as existencias dos adhesivos que fixéramos especialmente para ese día. Ademais, cando ao día seguinte chegamos á xuntanza que tiñamos acordada cos nenos e as nenas que ían colaborar no proxecto, descubrimos que contábamos con cousa dunha ducia máis de participantes novos dende a última vez que nos reuníramos. Non se pode pedir moito máis...

Ao rematar a presentación, cando xa amainara o rebumbio de estudantes e cámaras, decidimos gravar este vídeo para todas as persoas interesadas polo proxecto. Xron, Miguel de Lira, a profesora do IES A Cachada Ana Moreiras e tres rapazas que non temos identificadas (se nos len, pedímoslles dende aquí que nos deixen o seu nome para podelo engadir nos créditos) explícanvos de que vai isto do teatro 2.0.

Como se fai para montar unha obra teatral e contarlla ao público usando exclusivamente as redes sociais? Non estamos a falar de representar un espectáculo ao modo convencional e retransmitilo en streaming a través da rede. Nin sequera de escribir unha peza en forma de posts e twits e ir colgando o texto aos poucos ao longo dos días.

Ao que nos referimos é a pensar un proxecto especificamente para Internet, no que os personaxes se expresen de modo natural a través das redes sociais, no que se mesturen formatos e linguaxes, no que os comentarios dos protagonistas se mesturen co resto das mensaxes da rede, tan reais ou tan irreais como os amigos virtuais.

Se se che ocorre como poderíamos facer algunha destas cousas, pódesnos escribir a amores@redenasa.tv e deixarnos a túa aportación: poucas cousas nos gustan máis que recibir suxerencias.

Porén, se non sabes moi ben por onde tirar, confesarémosche que nós tampouco estamos seguros de como por esta iniciativa en marcha e asegurarnos de que o resultado sexa bo, pero logo que de varios meses traballando xa se nos foron ocorrendo unhas cantas ideas ao respecto e, aínda que non cho imos contar todo de golpe, si que podemos adiantar algunhas cousas.

A primeira é que para este primeiro intento de levar o teatro ás redes sociais decidimos adaptar Romeo e Xulieta, de Shakespeare, á Galicia do ano 2012, a un mundo que recorda ao noso, no que o amor dos protagonistas non será posible porque a familia e os amigos de cada un non aceptan a lingua na que se expresa o outro.

A segunda é que estaremos a traballar conxuntamente con alumnos de instituto, concretamente cos do IES A Cachada de Boiro. Gustounos a idea de colaborar con rapaces desta idade porque son os que mellor poden reconstruir os sentementos dos dous adolescentes de Verona da obra orixinal, e tamén porque todos eles son xa nativos dixitais que se manexan con completa soltura neste mundo de redes, vídeos e contidos dixitais.

Parece importante comentar tamén que o proxecto porase en práctica durante seis días entre o 20 e o 25 de abril, e que o relato poderase seguir dende calquera lugar do mundo facéndose amigo/a dos nosos personaxes, seguíndo as contas do proxecto en Facebook e en Twitter e visitando Redenasa.tv, onde o noso narrador, Xéspir, ordenará posts, fotos e material de vídeo para que sexa máis doado seguir a historia.

Dende logo, non tardaremos en volver escribir no blog para dar información, xa que temos moito que contar. Entre tanto, se queres saber algo máis desta iniciativa, podes ler este artigo.