Xa en nada botamos a andar Amores Prohibidos, este experimento teatral no que levamos traballando meses e co que trataremos de contar unha historia a través das redes sociais, así que nada máis apropiado que escribir un post no que por fin aclaremos como seguirnos e, igual de importante, como participar.

Para comezar, as datas. A historia contarase entre o 23 e o 27 de abril en tempo real. Isto quere dicir que os personaxes contarán cousas ao longo de todo o día, segundo lles vaian sucedendo. De todos os xeitos, se non es quen de pasar as 24 horas diante do ordenador (quen pode?) non te preocupes, poderás seguir a historia a través de redenasa.tv, grazas ao noso amigo Xespir que agora se meteu a Community Manager.

Para seguir, os xeitos de seguirnos e de falarnos. Esta historia non só é nosa senón tamén túa. Por favor, intervén na trama, participa, dinos que che parece!

Como?

Podes seguirnos (e falarnos, aínda que non estarás a intervir directamente no relato):

-A través do web http://redenasa.tv
-A través da conta de Facebook: www.facebook.com/redenasa
-A través do usuario de Twitter: @redenasa
-Buscando no Tuenti ao usuario Xespir

Podes participar na conversa e enviar material:

-Deixando comentarios no microsite dedicado ao proxecto a través de http://redenasa.tv
-Engadíndolle o hashtag #amoresprohibidos20 ás mensaxes de Twitter dirixidas ao proxecto.

Esperámoste nas redes!

O servizo de informativos do IES A Cachada ofrécenos unha nova entrega de Cachatronic informa con todas as novidades sobre Amores Prohibidos 2.0. Hoxe, todos os detalles sobre o reparto do proxecto e prácticas en redes sociais. Ademais, non perdades as declaracións María Yáñez e Xesús Ron, membros do equipo do proxecto. E, sobre todo, non esquezades seguirnos na Rede entre o 23 e o 27 de abril.

Logo de varias semanas traballando cos rapaces para decidir quen lle porá cara a cada personaxe, pasamos a unha nova etapa, que supón por un pé en territorio descoñecido: contar unha historia a través das redes sociais.

Por este motivo, dedicámoslle unha xornada ao Facebook, o Twitter, o Tuenti, o Youtube e demais redes sociais polo xeral proscritas nos centros educativos, e especialmente a como se poden empregar para contar unha historia a través de diferentes perfiles e "voces". Como era de esperar, os participantes coñecían de sobra todas estas novas ferramentas de traballo.

Lois e Natalia, alumnos do IES A Cachada de Boiro, ofrécennos este informativo especial sobre Amores Prohibidos 2.0, o proxecto no que o instituto no que estudan está a traballar con nós. Edición, gravación, interpretación e guión a cargo dos propios rapaces, que non deixan de sorprendernos.